Moin té i kroi gouvèrnman lavé trouv la klé pou dévlop la rishès la Frans, moin. Akoz moin té i kroi sa ? Pars toultan li di sa... Kossa li di ankor ? Travay plis, va gingn plis ! Vanj kont la vi shèr : sa promié prozé pou lo prézidan ! l’Éta va dépans moin konmsa bann fransé va pèy moin linpo, étsétéra, étsétéra, la ké lo ra...

Nana in n’afèr i apèl « la méthode coué ». Si ou i vé in n’afèr, répèt ali toultan-toultan apré ou va an avoir. Si ou la sho é ou vé pi avoir sho, i sifi dir : « Moin la fré ! Moin la fré !... ». Apré sa ou i san pi la shalèr... Moin la ésèy sa avèk mon kont la bank. Moin la di : « Mon kont lé o-vèr ! Mon kont lé o-vèr ! ». Mi sort gingn in lète i di amoin armète vit in moné déssi mon kont sansa mon kanar séra noir, vik mon kont lé o rouz. A bon ! Métod-la i marsh pa toultan sa alor !

Mi sort romark sa i marsh pa non pli pou in gouvèrnman, vik mi lir partou k’la Frans la fine rant dan la récession. Mi koné pa tro bien kossa i vé dir, vik la pa konmsa ni koz rant ti-kolon, mé mi san sa la pa in bon z’afèr. Mi pans moin na rézon, akoz mi antan dir gouvèrnman i arète èk son vakans pou trouv in bon solision pou tir son kolé dann la, donkalor pou sort dan la kriz.
Mi sort anvoy méssié Fillon mon bon konsèy, signé Justin. Moin la di ali : « I fo solman dir, épi rodir, épi ro-rodir : lékonomi la Frans i donn di gaz ! Lékonomi la Frans i donn di gaz ! étsétéri-étsétéra ». Pétèt va marshé, mé pa sir ! Kisa la vi la métod coué i marsh pa ? Bin la koué-la ?

Justin