Zéléksyon rézyonal i ariv. Konm d’abitide, nana in pé, lo gaz i mont... i kroi zot ossi, zot va nyabou fé in list… épi tan k’a fèr pou kossa zot i gingn-ré pa lo zéléksyon. Mi koné, in pé, la tonm dann malizé,pars zot té i kroi ou i pé gingn in zéléksyon, kan ou lé byin koni... dann out famiy solman… A si moin lété prézidan ! Mé, prézidan pou koi ? Pou aplik kèl program ?...Bin ! I fo an avoir in program pou sa don ? In pé, i mélanz bann konpétans l’état, avèk sète konsèy zénéral, in pti grinn bann konpétans la réjyon, in pé sète la komine... tourné, mélanzé, razoute dé pti kiyèr l’irasyonalité é anvoyé ki di ! Mé afors tourné-viré, zot i fini par bite déssi program Paul Vergès épi son l’ékip, i aplik dépi douzan, san molir, san féblir, san détourn shomin... in program lé si tèlman rish ké zot noré pa tro d’in vi antyèr pou mazine lo débi di komansman, dé la moityé d’sak la fine fé, d’sak la fine maziné, épi d’sak lé ankor, konm di l’ote, dann bann kartron. Lé vré , mazinasyon lé pa zot for. Lé vré, zot la souvan kont déssi baton tonton pou travèrs la rivyèr. Lé vré ankor ké nout péi La Rényon sé zot dèrnyé z’anfan la pankor énè, konm i di, lo kadé zot bann sousi... Sak i vé pa tro shanjé, sak i vé pa tro bouzé, sak la pèr révolisyoné… inkyète pa ! Pars la pa avèk banna, ké la mazinasyon, sar in zour o pouvoir ! I riské pa !

 Justin