Demoun i èm la plipar d’tan landroi zot lé né, lanplasman la matrone la antèr z’ot nonbri. Sé kan zot lé loinn zot landroi ké zot i apèrsoi sa bien, si tan tèlman ké tazantan dépitasion i pran azot : sa i anklav z’ot koko épi i rann azot mavouz... Kan in moun i artourn shé soi, dann son landroi sé la k’li san ali lo pli mié.
Mi mazine, pou Robert Gauvin (1) lé shoz lé konm sa galman, vi son manièr fèr èk son péi. Pou moin, li rogard La Rénion dann zié, li ékout lo batmann kèr, li poz la min déssi son fron. Li pansh konm in paran par dsi lo bèrso. Épi li koz dousman dann son zorèy : « mon péi, ou lé la ! », « ou lé la, dann mon kèr ! ».
Li rogard manièr viv demoun, zot tik-tak pou roganiz z’ot jardin kréol... La vizite i rann bann vié famiy désédé dann simetièr, le promié novanm. Li mazine ziska koman, dopi lo vant son momon an voi d’falmiy, li té i oi son péi. Li ménas bann san konprann i di son péi lé pa inportan, li anvoy azot fèrfout...
La rénion, In pti péi, mé in gran plas dann kèr Rober Gauvin : "La Rénion dann kèr !"

(1) "La Rénion dann kèr" - lecture par Laurence Dalleau, Danièle Moussa et Robert Gauvin. Avec accompagnement musical de Kiki Mariapin et Aldo Ledoux le 20 septembre 2008.

Justin