L’ot soir, moin la antann, dann télé, in sobatkoz. Maya Césari té linvité. É in zournalis té i koz avèk èl.
Sof son réspé moun-la, té i diré, par son postir, li té koné bokou d’shoz. Li la di la kandidate, d’apré èl, koman, in dépité loutremèr i sava fé pou fé antann son voi, dann in gran lasanblé konm lo parlman l’Erope si li lé pa afilyé in "gran" parti ? An dé mo si li lé pa kolé sanm in parti konm bèrnik kolé déssi galé pou gingn paké lo d’mèr.

Pou gaskoné, èl noré pi réponn : i vo myé ète tousèl ké mal akonpagné. Mé sa aryink pou kass ti-boi.
Pli séryé, èl la di lo boug : fi-t’in-tan, Paul Vergès lété lo sèl dépité loutremèr dann l’Érop ; é-bin, sa la pa anpèsh ali fèr dé shoz ; pars loutremèr la pa aryink fransé, sa lé osi éspagnol, portigué... Épi kan ou lé pti, ou i rode vré z’alyé ; é si ou nana bon zidé, lé shoz i pé byin marshé, demoun i ékout aou.

Maya la di ossi : si nou la bézoin l’Érop, l’Érop ossi la bézoin anou, pars nou ossi nana linportans, nou ossi nana nout gou d’sèl.
Mi kroi pa si lo boug la byin konpri aèl, mé mi pans bann moun té i rogard télé, zot, zot la byin konpri, pars son kozman lavé lo gou, la koulèr, l’odèr la vérité. Lété la vérité, pou vréman !

Justin