Na dé foi, in pé i anploye inn dé lékspréssyon, i tiliz inn-dé kozman, i fé l’èr sa lé sinp, salé évidan. Solman kan ou i fé travay in pé oute tète, ou i an apèrsoi lé pa si sinp ké sa, lé pa si évidan ké sa. Par égzanp, moin la tandi inn-dé di si l’alyans la pèrde zéléksyon, sé pars li la pa fé in program k’i kol byin avèk la vré vi. Donkalor, i fo ni sèye konprann kossa i lé la vré vi, kossa sa i vé dir, kossa nana ann-dan. Alon di konm de koi, la vré vi sé kan ou nana manzé konm ki fo, sé kan ou nana in kaz, kan demoun nana in travay pou gingn z’ot vi, sansa in moné sifizan, sé galman kan marmay i gingn alé lékol épi zot i étidyé byin. Nana d’ote shoz ankor mé alon kontante le minimome. Sa i sifi pou nou rann anou konte par nou-mèm, lé dir konète in vré vi issi dan La Rényon, pars la sityasion sé sak ni koné. A byinsir, i pé sèye kontante demoun pou dé zour, san plas larzan, san fé l’antropriz konm ki fo, mé si ou i kontante demoun pou dé zour, apré ou i pé pi kontanté. Ou i pé gaspiy larzan ramassé, mé aprésa ? Aprésa, larzan na pi, é demoun lé riskab dévir konte ou pou dir "gouvèrné sé prévoir" : pou kossa la pa prévi ? Sé sak demoun i tard ar pa di avèk lo nouvo Konsèy réjyonal é san tro tardé. Pars fransh vérité, la vré vi, sa i trap pa san nout dékolaz lékonomi, sa i gingn pa trapé si i fé pa lo dévlopman dirab.

 Justin