I paré, yèr, dan la zourné, lo prézidan la Frans, méssyé Sarkozy la mète a kritik lansyin prézidan François Mitterrand. Pou kossa solon zot ? Pars sé so prézidan-la, mor dépi in bon boute tan, k’la déside laz légal pou pran la rotrète sar soisantan. Sa in désizyon la pran lané 1983 si mi tronp pa. Ni pé fé dë romark : dabor inn, la pa obligatoir prann la rotrète kan ou nana soisantan, épi sé in n’afèr toute bann travayèr téi vé. Alors, akiz in moun, tousèl, sa la pa in bon n’afèr pou fèr… sirtou kan le moun lé mor. Arzoute èk sa, dépi 1983 la droite la pass vinn-sinkan o pouvoir san toush so date-la. Mèm lo prézidan Sarkozy,l ané 2008, la di li toush ar pa laz légal pou pran la rotrète... pars, solon li... bann Fransé la pa done ali in pouvoir pou fé sa. Bin alor kossa la s’passé dépi 2008 ziska zordi ? Pou kossa, li pans zordi, bann Fransé la mète ali o pouvoir pou sa ? Lé vré l’UMP la pèrde zéléksyon réjyonal in pé partou… lé vré la kriz lé pli dir koméla, mé kossa i ansèrv shanj so soisantan-la ? I di pars la kèss rotrète i gingn arpi fèr fass ! Mé la trouv kèk santène milyar pou la bank ! La trouv 755 milyar pou soidizan sov l’éro ! Arzoute èk sa, i toush pa lo boukliyé fiskal ! Alor, pou kossa toush lo soisantan… Akoz pa pran dan la posh sak nana lo pourkoi ? Ousa nana i fo alé rodé, pa ousa na poin ! Larzan i mank pa dann péi l’Europ. Fransh vérité ! Konm di lo konte : "Larzan i mank anou ?".

 Justin