Oplis ou i rogard bann shif déssi nout lékonomi, nout sosyété, nout lédikasyon épi nout formasyon, nout nivo d’vi, épi bann shif déssi l’anploi... si ou lé in pé onète, ou lé blizé romark nout péi lé pa assé sifizaman dévlopé. Astèr, si ni ékoute bann politik apré sobatkozé, é si ni kontante pran lé shoz an sirfas... ni pouré près kroir toute lé pou k’i dévlop La Rényon.
Poitan, lé pa vré ! Pars si lété vré, toute nora été dakor déssi bann gran projé... é nora pa sèy mète l’aryaz pou anpèsh lé shoz ariv o-bi. Pou moin, bann gran projé-la, sa lé néssésèr pou ékip lo péi, donn Kréol travay, donn demoun in bon formasyon — pa pou patine dann vide, mé pou trouv in bon boulo... permèt toulmoun rant dann in kaz épi an avoir toute sak i fo pou in vi korèk. Sé byin sak demoun, an mazorité, i vé zordi la Rényon, si mi tronp pa ! Tansyon pangar, bann gran projé lé byin néssèsèr, konm sak lé moiyin é sak lé pti, pars toute i amène galman la rishès, épi toute i soutyin inn-a-l’ote konm lo zo avèk la shèr. Sa mèm lo dévlopman !
Mé pa toulmoun i vé sa, an parmi bann politik : nana sak i kalkil, li pé gonf ankor byin son pla pèrsonèl, mèm si nout péi i dévlop pa... konm diré demoun lontan, la pa lo traka d’Sisya. Ni pé dir, lo martin la Droite i anvoy koz dann télé, lo Virapoullé i pans konm sa. Kan in pé i di l’intéré zénéral, li tradui sa son l’intéré zénéral. Pou lo rèst, avèk son blag, li roul aou kari sou d’ri !

Justin