Kan ou lé pti, ou lé monstré ! Si out momon i di aou donn manzé out ti-frèr épi ou la bien anvi alé zoué... bité, la rou loto, rod gouyav èk out kamarad, alor ou lé pa kontan. Ou i fé la malis out ti-frèr : ou i ranpli kiyèr, épi kan lo marmay i rouv la boush, ou i aprosh lo kiyèr, apré kan lo marmay i fé anm !, épi i fèrm la boush, ou i artir lo kiyèr an zourite.
Inn dé foi konmsa, apré lo marmay i sava s’plinn avèk out momon...

Tou sa pou di, néna in gouvèrnman i pran anou pou zanfan tann, pou paye-an-ké la plime lé koman koton, pou ti-shat lo zié lé ankor fèrmé... Konm dann lo zistoir la mobilité, li koné li la tor, alor li invante in zistoir pou fé dor dmoun débout. Koméla, lo moun - pa tout solman ! - i préfèr pa dor dobout. Konm si li kroi nou la pa konpri ali ? Li vé amorsé, apré sé nou, avèk larzan nou la poin, i ranpli lo bak léstasion. Gran prométèr, ti-donnèr !

Astèr, ala k’li di, ali-mèm va okip shèk-voiyaz, sar pi la Rézion. Oté, baron ! Trap shabouk, méssié Jégo !... Pli sérié, mète mové léspri par koté, é kont pa dsi nou pou alé souplègn avèk tonton Sarko. La pa nou va di : « ... li ténir manzé, li donn pa moin... ». Pardon-éskiz, nou lé pa konm sa ! Konte déssi, fié pa tro !

Justin