Lo pti prézidan Sarko la parti la-ba dan la Guyane pou souèt son bon vé bann l’Outre-mer pou l’ané 2012. Mi koné pa tro kosa d’moun dann péi-la i anpans sak gouvèrnman la fé dépi 2007, mé kan i rogard lé shoz dopi isi La Rényon, lé pa briyan. Alor, pa briyan ditou ! La pa pars lo ga la pa konprann kosa i fo fé dan bann l’Outre-mèr, mé plito pars li la pa vouli fé sak noré di fé. Sa i rapèl amoin in pé lo roi Louis XV. La pa pars mi pran Sarko pou in roi, mé pars lo roi Louis XV la gouvèrn la Frans dann in péryod la kriz. Louis XV osi l’avé konprann kosa k’i fo fé dann la Frans diz-uityèm syèk, mé li la profèr pa fé arien ; li la profèr défann bann privilèz bann privilézyé.
Sarko osi la bien konprann kosa i fo pou l’Outro-mèr. Lo sis novanm 2009, li la fé in bon l’analys la sityasion nout bann péi. Li la prppoz bann solisyon bien valab, mé li la dévir lo do — li épi son gouvèrnman ! — bann solisyon li l’avé propoz par li mèm. Donk, zordi, kan li vien adrès anou son bon vé, konm in bann promès li tyin ar pa ankor in kou, nou la anvi anvoy ali baladé. Pou koué ? Pars, sanm pou nou, li sé in marshann parol, in vandèr lo frui kontaminé avèk ti moush, in moun i vé fé pran anou blan-pou-noir, makaroni pou la bouji. I paré li vé vni La Rényon pou ésplik anou son program : mé son program sé sèt mésyé Didier, é program boug-la ni koné. Bann shomèr i koné ! Bann travayèr i koné ! Bann l’antropriz galman ! Katrovin pour san la popilasyon i koné, vi k’konm di lo kont, sé dsi nout do bann rish la manj la lène...
Alor, mésyé Sarko, pèrd pa out tan èk nou, out parol, nou lé pi la èk sa ! I pas dsi nou konm dolo dsi plime kanar !

Justin