In pé la si tèlman okip z’ot tan pou kriy zot i vé pa lo tram-train ké zordi, konm zot i koné pa si nana in n’ot solisyon, zot lé paré pou di n’inport de koi... Moin la antann dann télé Didier, lo zoli garsonn Tampon, li vé fé déboul dé mil kar déssi La Rényon, épi landroi k’i gingn fé kouloir pou lo kar… pou ranplas tram-train. Pardon-éskiz, mé in réflèksyon konmsa, n’inporte de ki i pé an avoir, provik li lé an parmi é li la fine prann inn-dé lèv-tète... mé kan ou i vé diriz in Réjyon, ou i pé pa di in kozman konmsa. Dabor inn, la pa la Réjyon i okip transpor déssi la route : sa Konsèy zénéral i fé sa… la prèv, sé li k’i okip kar jone. Arzoute èk sa shak komine i okip transpor déssi son téritoir, sé èl k’i pran désizyon mète lo kar, sansa taksi koléktif, sansa lèss roulé, ou byin lèss anboutéyé. Anboutéyé, sa Tampon i koné fé sa ! Bann Tanponé i san passé... vi ké z’ot mèr la kal la rokade noré pèrmète azot réspir in pé. Sa noré été fine fé zordi ! konm lo kontournman Gran-Boi. Dé mil kar, mi di azot ! Akoz pa kat mil ? Akoz pa plis, akoz pa moin ? Akoz pa dé mil dis, vi k’nou lé an dé mil dis ? Sa sé in kékshoz ou i di kan ou na poin aryin pou ranplas tram-train, in kékshoz byin préparé, byin étidyé, i rèss aryink pou komans fé. Lo rès i mérite son plas dann bann zélikibrasyon d’Antoine. Lo rèst, a-par tram-train, sé kozman la boush rouvèr. Kozman an l’èr, kozman mantèr.

 Justin