Tout demoun i koz pa parèy. In pé i koz an "nou" pou sak i vé pran zot résponsabilité, sansa pou sak i vé lo mérite dann in n’afèr lé pou toulmoun. In pé i koz an "JE" konm pou di lo mérite sé pou zot personèl, mé kan i rode l’otèr, la pi "JE" mé lé zot. Si i fé in n’afèr d’bien sé je ; si i fé in kouyonade sé lé zot. Na in pé i mélanj lo "je" avèk banna, bann moun-la. An parmi l’moun mi èm pa tro bann je-ist, pars sanm pou moin, sa in bann shoviy gonflé.

Akoz mi anparl de sa ? Pars in vré je-ist, in vré shoviy gonflé i sort bate in pti karé La Rényon. Kisa k’i lé ? Madam Penchard, biensir ! Dann son kozman, té i antan solman "j’ai décidé", "je vais débloquer", "mon ministère"... é patati, é patata, la ké lo ra. Astèr si i domann aèl pou kosa lo l’aviyon bonbardyé d’lo la pa vni avan, èl i réponn i ariv jus-a-tan. Dizon in répons, konmsi, dsi nout fron lé marké "kouyon". La vèy o soir, èl l’apré di lo bonbardyé d’lo lé pa fé pou tinn linsandi konm nana dan lé o, La Rényon. Méssyé Didier ossi té apré di sa, mé, konm di mon vyé paran, lintélizans méssyé Didier la pa kass lé kat pate in kanar. Tanka madam JE, èl i sèy fé kroir anou sé près èl la déside anvoy l’aviyon bonbardyé d’lo La Rényon. Dizon, èl l’apré sèy fé prann anou po-d’shanm pou pla kouvèr, makaroni pou la bouji.

Bon pou sa mèm, mé nana in n’afèr l’apré fé travay mon tète : l’aviyon té paré pou démaré in somènn avan donk li nora ariv La Rényon kan té fine bril bokou moins ké troi mil éktar, donk avan ké la foré lo Pti Bénare nora fine brilé, avan ké bann plantèr Sin-Lé nora fine pèrd zot patiraj, avan ké sak i apèl La faune épi la flore nora fine brilé konm zordi. Alor, moin lé sir-é-sèrtin nora fé dé tyèr déga an moin. Bin alors kisa lé résponsab tout so déga la fé anplis ? Kisa va répar sa ? Pli pir, i koné pa si lé possib répar sa ? Mon késtyon sé sèt-la : madam JE, kosa i fé éstèr ?

NB : moin la antann dann in radyo, konm de koi, lo pilote l’aviyon la di son mashine lé bien kalkilé pou ède tinn dofé konm sète i sort pran La Rényon. Donk, konm moin la fine di, na bonbardyé d’lo épi na sharjèr d’lo. Fransh vérité !

Justin