So matin, moin la antann in n’afèr dann radyo. Z’afèr-la la étone amoin in pé... pa tèlman an li-mèm mé par la konsékans in pé i prétan sa i pé an avoir dési lo tourism. Pars défoi ou i pans, ou i sava fou in kou d’ékla é aprésa, konm di lo kont, l’afèr i foir. Pou in kou d’ésé, i pé ète in kou d’mètr, konm pa ! Mi vé anparl lo kontra l’IRT la sign avèk PSG pou san soisant kinz mil éro. Pou so pri-la, i prétan dir, La Rényon i sava bénéfisyé in promosyon pou fé vnir bann touris isi.

Bien antandi, sak i étone amoin, la pa lo kontra an li-mèm l’IRT la signé, pars in klèb foutbal profésyonèl i sign in bonpé kontra avèk in bann partnèr, bann ti-partnèr, konm bann gro partnèr. L’IRT, sa in pti partnèr par raport d’ot sé bann gro... konm nana pti poison épi nana bann gro. Pétète La Rényon va gingn touris anplis, pétète pa. Pétète bin k’oui, pétète bin k’non. Dizon, mi pans lé riskab sé in kou d’azar, pars moin lé pa sir, la fé, konm i di, zétide séryé avan sign lo kontra. Poitan, si mi tronp pa, sé par la-mèm ké bann gran manajèr i doi komansé. Si la pa fé sa, pou vréman, l’èr-la i pran in risk konm bann zouar pokèr i pran, mé avèk zot larzan, pa avèk larzan Rényoné.

Astèr, konm mi koné désèrtin moun La Rényon, mi pé pans, in pé i oi lé shoz in drol fason. Konm par égzanp in pé i pé di zot va gingn biyé pou alé oir match PSG, é mèm fé parti in délégasyon pou voiyaz gratuit, é lokazyon lé bon pou fé in pé biznèss la-ba, sansa pass in bon ouikènn. L’èr-la, la pa La Rényon sré gagnan, mé lo kontrèr. Mi di sa konm sa, mé sé l’avnir va dir anou la konsékans lo signatir.

In n’afèr kant mèm ? Zot i pans pa, so bann dépans, san tro kalkilé, in zour sa lé riskab mète la Réjyon dann l’andètman. Zour-la, li va viv a krédi, épi konm té i di lontan, kan shakinn n’avé in karné la boutik shinoi : « Mète dési karné, kan nora va péyé ! ».

Justin