• Matant zélida la ékrir Justin :

 Mon shèr nové, mon spès salté, sé avèk plézirasyon ké mi ékri aou zordi. Ou i dovine pa in pé pou kosa ? Kalkil byin ou va oir ! Alor, zot osi, bann rouj de fon, zot i gingn fé proférans ? Alor, si zot na d’la plas, zot i ézit pa rékonpans z’ot prop famiy ? Éstèr ou la konpri sak mi vé dir aou ? I falé byin, lo papa i fé in n’afèr pou sa fiy ! Romark, mi roprosh pa, sa lé imin in n’afèr konmsa ! Solman, mi di aou, pars a s’ki prétan, zot i azi pa konm toulmoun… sof so foi issi !

• Justin la fé pou répons :

 Mon vyé matant ! Alors, ou osi na la bil dann kèr konmsa don ? Mi rogrèt in sèl z’afèr sé k’défin momon lé tro bon pou vnir ral out zong de pyé la nuite, pars ou nora mérité.
Kèl "kado", lo papa la fé lo zanfan ? Èl l’avé pa bézoin sa, èl pou gingn son soso. Èl té pa o shomaz èl, kontrèr èl l’avé in bon travay, in bon fonksyon épi èl nana in bon kapasité. Son diplom, la pa dann boit savon èl la tir sa ! Alors, kan sé in moun la droit i okip in bon post, i di pa aryin ! Kan sé in moun i sort déor, parèy ! Na poin aryin pou signalé ! Kan sé in zanfan kominis, la sé kaziman in péshé !
Pou anshèv kontant aou, m’a dir aou in n’afèr : sé gouvèrnman la droit i sort domann aèl zoué in gran rol dann z’éta-zénéro... Matant, anval pa out kiyèr pou sa !

Justin