Prézidan la parti vizite salon l’auto. A s’ki paré, li la sirtou rogard bann ti-lauto i larg pa tro gaz karbonik dann l’èr, épi ossi bann lauto éléktrik. Li la pa parti louk bann lauto bèl kok épi gourman késtionn karbiran... ; pou rézon k’sa i polié drolman. Lé bien sak li la fé, moin, pèrsonèl, mi pans lé bien. Toulmoun la fé konmsi zot lété dakor.
Sof ké, in moun an parmi lo moun la kri : « Bann lauto la pa ékolo ! ». Alor la loi la trap ali, par son po d’sa-mèm, la mète ali déor. La pi antann parl dé li. Solman, in néstan aprésa, Prézidan la fé in diskour, épi konm son lang té k’i grate, li la di lo boug sé in « alumé du bokal » épi li la di galman rozman na poin in ta d’moun konmsa... Mé li mèm la done lo boug rézon, vik li la di lo bann lauto i doi roul èk kouran k’i sort dann bann santral nikléèr.
A bon, la lé ékolo alor ? Bin, kossa va fé avèk bann déshé ? Va mète dann la tinèl, déssou la tèr épi va atann 400.000 an ké lo bann déshé i vé bien dékonpozé. Alor lé ga, bonome-la lavé rézon, ou li lavé pa rézon ? Pou moin, li lavé rézon, é pliské. Léléktrisité nikléèr, sa la pa dévlopman dirab inn tiork ! A si lavé pran léléktrisité solèr, sansa fé avèk lo van, la mèr... mé pa avèk so poizon l’imanité.
Bann lauto lé ékolo, oui ! Mé lo kouran, lé pa ! Fransh vérité !

Justin