Dépi promié zilièt, la Frans la pran son tour pou ète prézidant konsèy l’Europe. Sa i shanj. Dé foi par an, i apèl sa l aprézidans tournant. Antansion, i fo pa konfonn prézidan konsèy, avèk prézidan l’Europe, akoz ziska koméla la poin Prézidan l’Europe.
Bien sir, la-ba dann La Frans la fé in gran dézord, la mèm dékor la Tour Eiffel. Lo prézidan, konm dabitid, la di li sava fé in politik la riptir. Lèss kozé, nou va oir, mé pou mon par, mi di solman : « Rozoir vide, i fé bon pé dézord ! ». Akoz mi di sa ? Oir zot mèm ! Inn i ral, l’ot i pouss, i ro-ral épi i ro-pouss. I fé l’èr bann gran vaza, lé pa dakor inn avèk l’ot.
Sarkho i angrène in komissèr l’Europ, séte-la i dékil pa dovan li, i donn ali dé-troi koudbèk épi i rofiz son linvitasion. Kont pa dsi moin pou vnir assiz mèm tab ké ou ! Lo prézidan La Pologne i di « traité lisbonne lé mor ! Larg in pé mon l’ourlet èk sa ! ». Poitan, a s’ki paré li lavé promète signé. Ala k’li lé pi dakor ! Lé vré bann z’Irlandais la anvoy z’ot konstitision sinplifié fèrfout.
Mi mazine nout prézidan, k’té i pans , konm in zoro li té i sava règ bann problèm l’Europ, té i kroi konm par mazik lo bann zafèr té i sava aranzé, lo tan té i sava klèrsi. Son figuir, zordi, i doi assiz in pé : mié komansé k’sa, i pé pa !

Justin