Zot i koné Christian Estrosi ? Moin lé sir zot i koné ali. Bononm-la sé lo mèr la vil Nice, épi an mèm tan li lé minis l’indistri. Sé lo boug l’apré fé in gayar tramway dann son vil épi li vé pa ké ni fé nout tram-train. Touléka, sé sak li la vni dir dann la kanpagn zéléksyon, kan li la vni pou siporte méssyé Didier Robert : li té i porte garan ké gouvèrnman téi sar pa mète in katsou anplis pou ède anou... lo prinsip l’égalité, sa li anvoy fèr-foute.
Donk Estrosy, sa i tonm in dalon Sarkozy, mèm li té prézidan l’assosyasyon pou soutyin lo laksyon lo prézidan, konmsa li té i gingn fé la kolèkt larzan. Par l’fète, i di pa, so l’assosyasion-la la gingn in shèk 7500 éro avèk la famiy Bettancourt. Késtyonn, pétète gonf in pé lo pla la kanpagn son shanpyon.
Byinsir, li tonm dalon avèk méssyé Woerth, é in lindi li la vni déssi France Inter, pou défann son dalon. Méssyé Estrosi, pou sak i koné pa li, sé in éspésyalis dann lo trokaz la lang, i apèl sa lapsus. Alor, pou byin défann son dalon, li la ésplik lo boug lété lo minis « la rotrète bann réform ». Bon nouvèl ! Lété tan in minis i artir in pé so bann réform-la. Mé i paré solman ké sa foursh la langué, li té i vé dir « minis la réform bann rotrète ». Touléka, sa i amontr ké li la fine fatigué èk sa pou fé in tronpézon parèy. Alor, i fo kontinyé mobilizé pars avèk in bann partizan déterminé konmsa, i tarde pa la kord i kass é ké la réform dé rotrète i dovyin pou vréman la rotrète bann réform*.

Justin

* moin la lir sa dann zournal Marianne, in kozman Alain Rémond.