Moin lé a d’mandé kèl koté La Rényon lé déviré. Lé vré, nana in zéléksyon é kan i ariv zéléksyon lo gaz in pé i lèv, mé alé konprann pou kossa demoun i mète a dir in paké la kouyonade konmsa, demoun i sort issi… épi demoun i sorte déor galman. Romark byin, sa i rapèl amoin in pé lo tann lontan... lo tan nou lété dann fénoir, lo tan té i sousyé pa lo droi d’moun, lo tan kolonyal... Dann tan-la, sifi k’i kalkil ou sé lé in pé rouj déssi lo bor, ou l’avé poin lo mèm droi ké lé zot : out marmay té i gingn pa la bours, déga siklone ou té i gingn pa oute dé katsou, mèm in papyé ou l’avé poin lo droi alé rode la méri. Sa lé vré, pou vréman ! Mi ansouvyin, in ga l’avé in karo bazar, é la mète ali déor pars li la rofiz lo bonzour in gro vaza politik la droite. Zot va di amoin lo tan-la lé mor é antéré. Mor é antéré ? Alé kroir sa ! Méssyé Estrozi, la vni sèrv zarboutan pou Didier Robert, lo zoli garsonn Tampon, é li la di si Paul Vergès i gingn zéléksyon kont pi gingn larzan avèk la Frans, si sé Didier Robert, gouvèrnman va gonf nout pla. Méssyé lo minis, tan-la lé fini é kont pa ké la va artourné. Moun vilin na ankor, moun kouyon la pi. Mète sa byin dann oute posh, oute moushoir par d’si.

 Justin