Matante Zélida la ékrir Justin :
Mon shèr nové, mon spès salté, si mi antan byin sak zot l’apré dir, La Rényon la rokilé plito k’avansé : nana plis san vin mil shomèr, plis san dis mil ilétré, plis ankor la moityé dmoun lé pov... Si lé byin vré sak bann rouj-de-fon i di, sé la fote sak lé o pouvoir ! Ou i suiv amoin byin ? Bon bin, la pa Paul Vergès ké lé o pouvoir, é dépi in pé d’tan déza, donk sé sa fote si La Rényon lé randu konmsa ! Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr... la, vi sorte agrandi ankor roiyome la kouyonis... Byinsir Paul Vèrgès lé prézidan Konsèy réjyonal, mé li la poin lo bann pouvoir k’i fo pou règ toute problème séryé. Li lé pa lo mèr, li lé pa prézidan Konsèy zénéral, li lé pa prézidan La Frans ! Li propoz in politik, mé lé z’ot pouvoir lé pa oblizé aplik sa konm k’i fo, pars si zot té i fé, moin lé sir nou n’ar été in pé pli avansé. Kan li di i fo donn la min toulmoun ansanm, nana in pé, tète dir, i ral par koté...

Justin