2 zwin 2010
Matante Zélida la ékrir Justin :
Mon shèr nové, mon spèss salté, si mi di aou yèr moin té kontan, mi sipoz ou sar pa étoné. Vi koné pou koi ? Pars Didier Robert la antèr lo tram-train. Konm demoun i di, ala ankor in projé "pharaonique" la kass par boute. Moin lé sir bann rouj-de-fon, so matin nana la guèl de boi. Tok ! Pran sa pou toi !
Justin la fé pou répons :
Mon vyé matante k’i koz touzour la boush rouvèr, aou ossi i parl "faraonik" éstèr. A oui ! Faraonik, sa in mo lé byin anployé koméla ! Mé si ni kalkil in pé toute projé lé faraonik issi ! La route la montagne, kan la fé, lété pa konmsa… ou i pans sa la fé avèk la krash ? Lo Port La pointe des galets épi lo train, kan la fé sa l’ané 1885, sa lété pa faraonik sa... Ou i pans la fé sa avèk kréyon déyèr zorèy ? Lo por Saint Pierre, l’izine éléktrik Takamaka, la route la plaine, la route an kornish èl-mèm, épi tan é tann d’ote shoz ? Armète la-dsi lo baskilmann lo l’èst-an-ouèst, la route tamarin. Sa la fé an siflan ? Nout natir sé nout natir, avèk son bann ravine, son bann montagn, son térin volkanik é nou lé blizé batay avèk li dé foi kont li, pou fé moindreman kékshoz in pé konsékan. Mi aspèr solman lo nouvo projé la route litoral... si i nyabou fé ! Nou va oir si sa ossi sar pa faraonik.
Justin
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).