Le nïméro 1 de Kivi lé gadianm, sa lé sir.(photo BBJ)

Sat i koné pa, alé rod dann diksionèr. Kivi, sa bann blan la maronn zinpo kolonial èl lanzolaz lespri, la mont dan léo po profit anfin la liberté. An sé tan de kriz, nana bonpé i voudré mont kivi. Ogard bien magazine là, "Kivi", la mèt in kostime la soi, prézanté kom po kass larmoir. lékip le magazine Kivi, la gardé le bon mazinasion la revï Nout Lang. Nou retrouv bann zesprésion, bann farfar le mo. anpliskesa, nana gayar lamontraz foto. Si zot i remark bien, zot i trouv dë kamarad Témoignages, Yves Van Der Eecken èk Georges Gauvin. Sinonsa, zot i trouv osi in lékip gabié, ansanm Bertrand Grondin, José Macarty, Sabine Boyer, Teddy Iafare-Gangama. tout la bann la mèt ansanm po fé sort po nou in gayar ti revï, i pé lir toulézour, i pé mèt dan la min marmay. Kom nou fèt la semèn kréol, la sorti le magazine Kivi i tonm bien. Anplis, kom nou ariv dann la périod Mariaz, banna la fé sort in nïméro spésial dési Mariaz la pa badinaz, an fransé, an kréol. Tout le monn lé kontan. O-fèt, zot va trouv anndan là in lantrekoz ansanm Danyèl Waro, dési son mariaz ansanm Florence Félix. Mariaz là té fé an kréol, dan in tradision malbar, épisa selon la pratik katolik. I prézant osi in skiltèr, Nelson Boyer. I prézant osi la sitiasion lalang kréol a Moris. E si zot i vé konèt ankor pliss, alé trapé. Normalman, tout bon vandèr-d-liv, nana dan son libréri le magazine Kivi.

Malgré sa lé bien ...

Le nïméro 1 de Kivi lé gadianm, sa lé sir. Soman, ni pé pa anpéshé fé détroi remark. nana inn kestion i roul mèm dan mon boush. Akfèr fé la piblisité po in mark boit-konsèrv. la vi lé sitan shèr koméla. Royal "Bourbon" la mont kivi, kosa ? Si i ékri in lartik dési nout gayar fason fé kui manzé, nana in takon zafèr po montré la Rénion. Soman, lé in pé bizar trouv in gran lantrepriz dann in magazine soidizan ti-kolon. Ot shoz, sé dési la paz de Une, zot la mèt an valèr Art Sénik, soman ni trouv pa lartik i kol avèk. Si Art Sénik sé in landroi démavouzé, amont le koté démavouzé. noré ét pli gayar si zot lavé mèt Nelson Boyer dann lankadré Ar Plastik. Sinonsa, na poin rien po dir. dawar, tousala va mèt an plass dann proshin nïméro.

Bbj