Kan in pé té i fé sak i fo pou mète lénèrzi solèr anlèr, d’ot té i pran pa kont : zot té pa la èk sa ! Kaziman zot té i s’anfoutsa !
Lèr-la, nou té i oi déssi bann kaz, déssi déssèrtin limèb shof-o solèr, sansa bann plak solèr ; alors, nou té i di, dann nout kèr : "La Rényon i avans !"...

Solman, sak nou té i oi pa, sé lo bann shof-o k’i marsh èk léstrésité : sa l’avé partou é an kantité. I prétan dir si téi poz dis-mil shof-o solèr, té i poz dann bann kaz, dann bann limèb, dann bann ladministrasyon ziska vin-mil shof-o éléstrik dann in sèl lané.
Dizon lo vèr té apré pik lo kèr nout dévlopman dirab !

Rozman, na inn-dé zour, gouvèrnman la fini par fé sort son dékré. Konm di lo kont : dékré-la té o fé dépi in an-édmi, vyé motar k’zamé.
Épi, dann dékré-la nana inn-dé zafèr lé intéréssan : anparmi, lé oblizé mète shof-o solèr inpé partou, dann bann mézon nouvèl, bann zimèb i sava fé, épi mi éspèr ossi kan va agrandi bann lopital.
I vé pa dir nora pi shof-o léstrésité, mé nora moins. Dizon i sava dann bon sans, ni avans in pé plis dann shemin lotonomi pou lénèrzi.

Pa aryink sa ! I marsh an avan galman pou nout nivo d’vi, pars, a s’ki paré, in shof-o solèr i pé fé ékonomiz in famiy ziska kinz éro par moi. Sé pa larzan k’i rant, lé vré ! Mé sé larzan k’i sort pa !
Nout larzan lé pa myé dann nout posh ?

Justin