Ni vé, ni vé pa, nout l’istoir sé nout l’istoir, nout passé sé nout passé. Ni vé, ni vé pa, nout péi la viv ofisyèlman dann rézime lésklavaz ziska vin désanm mil-hui-san karant-uit. Ni vé, ni vé pa, bann trafikan la tir dmoun lafrik, Madagaskar épi d’ote l’androi ankor épi l’amène azot par la fors dann péi bourbon, pou travay konm zésklav. Ni pé an avoir la onte, lo rogré, mé i shanj ar pa aryin : sak la s’passé, la s’passé, lé konmsa é pa otroman.
Alors kossa i fo fèr ? Kèl rogar ni doi an avoir par raporte nout passé ? I fo makiy la vérité, manyé lo mansonz, fé kroir d’moun nout sosyiété lété konm in paradi pou demou la viv issi an zésklav. Pou mon par, mi pans pa k’i fo fé konmsa, mi pans k’i fo di la vérité, mèm si èl lé pa tro zoli, mèm si na in loi k’i di la trète bann moun, épi lésklavaz sé krime kont l’imanité... lé shoz lé komsa, sé sa nout vérité. Mi anpans lé myé k’ni rokoné sa. Pou kossa ? Pars la vi in pèp i apartyin pèp-la, sé li ki doi assimé, sé li k’i doi viv avèk so réalité-la, sé li k’i doi an avoir kouraz pou fèr-fas.
In pé i pans, i vo myé pa anparl la réalité, konmsa i mète pa la trankilité nout sosyété an danzé... mé demoun i koné la vérité, alors la pi moiyin pou kashyété. Alors,i fo sèy prézante nout passé konm kékshoz, in pé imin, moins inimin ké dann d’ote landroi. Mé la pa bézoin fé in n’afèr konmsa ! La pa bézoin zot i fatig anou avèk la mant-ri d’in lésklavaz avèk in vizaz imin.

 Justin