Dann nout tèr na poin pétrol, mé ni anploye in bonpé l’ésans, gazoil épi lo gaz. Na poin sharbon dann nout sol, mé in bonpé léstrésité ni fé, ni fé sa avèk sharbon. Nout l’ékonomi, pandan lontan, lété bazé déssi l’agrikiltir, mé nou na poin bonpé la tèr pou nou planté. Nout péi lé pti, mé nana in bon pé d’moun i viv issi tèlman k’in pé i di nou néna in démografi galopante. Arzoute èk sa, nout pèp lé porté déssi la kiltir popilèr, é solon in pé la kiltir, sé in liks pou bann moun dann péi dévlopé. Armète ankor èk sa, nou lé si tèlman loinn l’Érop...
Si i ékoute bann gran grèk, bann sèk lé propriyétèr, solon zot, la syans infiz, tourn konm i vé, sote konm i pé, nou lé dann in ka d’dévlopman inpossib. Pou kossa ? Pars koté k’ni vir, nou na aryink poin fèb é nou na aryink poin noir... A bon ? Bin la volonté politik, sa i kont pa don sa ? La formasyon nout zénès, sa i ansèrv dé riyin sa alor ? Solèy, lo van, la mèr, volkan, sa lé pa bon pou aryin non pli ? La konésans nout listoir, nout travay déssi la kiltir, noute l’anvi défann nout l’anvironman ? Tousala poin noir, tousala poin fèb, tousala z’anbèk déssi shomin noute dévlopman ?
Non ! An kontrèr ! Pars sak nou la planté l’apré komans pousé. Noute révolisyon la komansé, é plis li va marsh an avan, plis li v’alé vite, dann toute séktèr : dann l’otonomi énèrzétik san karbone, dann transpor toute sort kalité, dann la syans, dann la kiltir, dan la formasyon, dann la réfléksyon filozofik. Sak va viv va oir, é sak li va oir i sora valab pou vréman.

Justin