8 avril 2010
Matante Zélida la ékrir Justin : Mon shèr nové, mon spès salté, Vou la romark in n’afèr vou ? Vou la romark sindika la pa mayé dann zéléksyon ? Zot la konpri k’la politik sé la politik, é lo sindika sé lo sindika. Donkalor, la pa vouli assosyé avèk l’Alyans, é la lèss bann rouj-de-fon tousèl a débrouy zot kari... Dayèr, lo kari la brilé, é zot k’i pansé gingn lo zéléksyon doi dann né, la koup la manké, é zot la gingn in sak lo kou. Byin fé sa pou zot !
Justin la fé pou répons : Mon vyé matante k’i koz aryink la boush rouvèr, Ala éstèr ké z’afèr sindika i intérès aou ! Ou i ansouvyin ankor lo tan kan défin papa avèk défin tonton lété dann sindika bann aralèr d’piosh ? Sa té l’bon tan sa matante ! Mé kozé lé bon, fèrm sa boush lé pa si mové ! La prèv a konviksyon ? Zéléksyon lé fini, mé in bann sindika batiman i komans kriyé pars si i fé pa tram-train, si i fé pa la MCUR, épi d’ote shantyé ankor, sé sète mil travayèr an plis ké sar o shomaj, é in sindika i pé pa fé konmsi de riyin n’été. Astèr zot i souvyin la pa fé la rokade Tampon, lo Zénith, lo Pole Oséan, é sa la mète bon pé dmoun dann somaj. Donk ou i oi matante : okip pa la politik, mé èl va okip aou, é konm i fo !
Justin
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).