Mi rapèl in tan, pou rant dann in ladministrasyon té i falé konète lir, ékrir épi konté. Lé shoz la shanj in bonpé, mé konté sa in n’afèr byin difsil. Pars sa i dépann si ou l’apré kont pou lo tan passé, pou lo tan prézan ou pou lo tan fitir. Sa dépann kosa ou i konte... demoun, mouton, sansa ankor san-pyé, ou byn mil-pate. Si ou i konte demoun, i prétan dir sak lé pli fasil pou fé, sé konte lo bann pate épi diviz par dé... mouton parèy, mé i fo diviz par kat.Pou san-pyé, sansa mil pate, la lé pli konpliké... kon é pliké a la foi.
Gouvèrnman, tanka li, i konte lo to d’kroisans, pou l’ané an kour, é pou l’ané k’i vyin. É pou dann dézan. Myé k’sa, li konte la rédiksyon la dète.Par égzanp, li di lané 2009 défisit lété plis uit-pou-san, l’ané 2010, sar sis-pou-san, é dann dézan nora pi défisite ditou. Zot i bate pa la min pou li ? A mon Dyé ségnèr, Marie, ma bone mère ! Lé possib in n’afèr konmsa ? I sava fé frin motèr, sansa frin plakète ? Touléka, sak moin lé sir sé k’in pé, zot sar blizé fouy in-dé nouvo trou dann zot sintir.
Arzoute èk sa, i fo gouvèrnman i koné konté pars prézidan l’avé déklar in kroisans dé édmi pou san pou l’ané dé mil onz. Toudinkou, li anons dé-pou-san ron dsi lo poin. Li l’avé tronpé. Ki k’i di si i tronp pa ankor in kou, pars solon in ga i apèl Konebendite, déklarasyon Sarkozy lé ossi valab ké sak Domenech dann tan mondyal fotbal. Alélouya !

Justin