Actualités

Georges Gauvin, section de Saint-Denis : In parti rotrouvé,in parti vivan, in parti mobilizé, in parti paré pou bann konba ni doi améné.

Que retiens-tu de notre Conférence Extraordinaire de ce 30 septembre 2012 ?

Témoignages.re / 10 octobre 2012

Des camarades de Saint-Joseph, Le Port et Saint-Denis tirent les enseignements de l’assemblée du 30 septembre à La Rivière.

Nout parti lé ankor vivan ! Sansa koman i pé ésplik plis troi mil kamarad la pran zot kart an moins troi moi. Arzout èk sa, ni pé avoitr konfyans fé ankor dé mil adéran ziska la finn l’ané.
Nout parti lé mobilizé : sansa koman i pé ésplik , in dimansh , nou la vni abou réini plis mil sink san adéran. Si ou lé pa moboilizé, apré in grav défète, demoun i éloign de ou, i vien pa èk ou.
Nout parti lé dann la défans zintéré lo pèp rényoné. Sansa koman i pé ésplik ni fé avans ankor bann solisyon pou koméla épi pou domin, solisyon pou fé fas l’irzans sosyal é pou konstrui nout dévlopman ékonomik, sosyal, kiltirel é anvironemantal.
Nout parti i prépar ali pou ranport bann viktoir k’i fo. Sansa, koman i pé ésplik li fé avans son solisyon san ont é san pèr par rapor bann z’advèrsèr. Ni pé di li lé tousèl zordi pou fé sa.
Nou l’avé bien bozoin retrouv anou pars nou la ankor bézoin fé sikatriz nout bann blésir é mi pans, ti-lanp pti-lanp nou va vni abou an kontan dsi nout prop fors.
Sak mi atann so kou isi ? In gran kongré, in kongré militan sinsèr, fidèl nout prinsip, in statézi klèr pou nou trap shomin la libèrté, shomin dévlopman, shomin pou mète nout péi anlèr. Mi atann osi in bon l’organizasion par l’amalgame bann z’ansien épi bann nouvo, dirizan konm militan la baz : amalgame, konm bann z’armé révolisyonèr la fé souvan dé foi.
Apré nout gran rényon dimansh 30 séktanm, moin na konfyans dann la rokontriksion, moin na konfyans pou kontinyé la lite...


Kanalreunion.com