Lenoir, dèrnyé garson méssyé Kass-koko-pou-boir-delo, la v’nyabou ariv Palé lo Roi. Li l’amenn in zoli grap létshi byin rouz, byin mir, gro zépol é-tou-é-tou, dizon létshi Brakanote. Kossa v’arivé éstèr ? Lo Roi i sar manz létshi-la pou vréman ? Lenoir va maryé, i maryé ar pa avèk la zoli prinsès ? Alon suiv l’afèr épi nou va rann anou kont par nou-mèm !

L’avé inn foi, dan la vil de Foi, méssyé lo foi la manz son foi èk in grinn sèl

La zoli prinsès la mète grap létshi-la déssi in plato épi la fé aport plato-la dan la shanm le roi. Èl l’avé pèr son papa té i manz pa lo létshi, pars dé foi bann malad lé konmsa. Dann z’ot kèr, zot vé manz in n’afèr, pétète z’ot kor i domann pou vréman, mé souvan-dé foi, zot nana movèz boush épi léstoma i rofiz. Alors, apré sa le moun i tonm ankor plis malad é la famiy i démoraliz ankor plis !
So kou issi, la pa éspas konmsa : le roi la sote déssi létshi-la épi la manz sa konm in goulipia. L’arès aryink la po pou fé la malis an frotan déssi l’né é i paré dann shato, zour-la, la pa manké d’moun pou fé la malis z’ot dalon.
La rès galman lo grin, avèk lo pti boi, pou fé ti-toupi é la pa manké non pli so zour-la. Anfin, tout demoun la zoué konm marmay pars la maladi lo roi té fini épi la vi té i pé arkomans konm avan.
Konm avan ? Sa lé pa sir !

Kriké, kraké ! Kriké méssyé ! Kraké madam  !

Pars lo grann kèstyon lété : kossa i fé avèk Lenoir ? Lé vré, la famiy Kass-koko-pou-boir-delo la raplik an vitès : sa i èm larzan ép i vé rant dann famiy lo roi ! La prinsès la fine fé promès, alors èl i pé pa dédir ! Le Roi i fé sak son fiy la promète. Mé Lenoir, kossa li vé li ?
Lenoir i mazine son vi la-ba dan l’ilète, gouyavyé kan lé mir, mèrl péi kan i shant, son pti plantasyon é tout sak i fé son vi. Ala ké li argrète déza, li la pa zète lo grap létshi é poitan té pa lanvi k’té i mank ali.
Pyèz ! Li la tonm dann in pyèz ! Koman démayé, koman shapé, koman artourn dann son gafour pou zoué avèk son martin filé koupé, koman donn manzé son dé pti kok nagazaki... Azout ék sa, tousa d’moun l’apré louk aou ! Lo bann dignitèr l’apré fé la moral ! In pé ziska l’apré résite dovan ou in bann kozman déssi fasson viv dann palé-lo roi... Sov pa ! Zandarm lé kapab kapay aou !

Kriké, kraké ! Kossa Lenoir i sava fé ?

La lé blizé maryé ! La lé blizé rant roi, in zour kan lo roi va déside pran son rotrète ! Fransh vérité, Lenoir i koné pa kossa i fo fé, pars koté lo palé, nana gran-gran bitasyon épi zanimo tout kalité : bèf-li, shoval-li, koshon, volay, kanar, sa i kont pi ; épi bann zoizo i sort déor : péroké, lo pan.
A ! Tousa la té zoli... Ti kok nagazaki na plis san ! Pti zardin, na plis dé san ! Mèrl, nana partou dann pyé d’boi ! Li la pi anvi armont dann son gafourn... Épi, nana konm in n’afèr mazik la spassé : sé konm si li pé pi s’an pass la prinsès épi la prinsès i pé pi s’an pass dé li ; l’amour la poz déssi zot san avèti !
Rozman pou li, pars dé gabyé kosto, la fine karsèr ali, mète ali dann in bégnoir, bros ali, savone ali, nétoiy ali. Aprésa, i mète in zoli linz déss li. La pi pou dir li maryé pa é toutfason, le Roi la fine désidé !

La fé in fète, konm l’avé zamé fé : la fé la mizik troi zour d’ran ! La dansé zour konm nuite ! Lo pèp té vyin pou bate la min, aplodi lo nouvo prins é la prinsès épi pou ranpli ossi z’ot bouzaron pars manzé téi mank pa !
Moin ossi, moin té la-ba, solman pèrsone té i koné pa moin ! Moin la dmann in boute gato, la larg amoin in koud pyé ousa zot i koné é moin la tonm tèrla pou rakont azot zistoir-la !

Kriké, kraké ! Kriké méssyé ! kraké madam ! Koton mayi i koul, rosh i flote !
L’avé in foi, méssyé lo foi, dan la vil de Foi, la manz son foi èk in grinn sèl !

Zistoir-la la fini. In zistoir Axel Gauvin la ramassé,
G. Gauvin la rakonté.