La, la fine di la viann volay i sar goumanté, la viann koshon galman épi la viann bèf. Akoz ? Lé sinp pou konprann : manzé zanimo i sar pli shèr. Zot i konpran, pétrol i anshéri, transpor lo pri l’apré forsé, armète ankor la-dsi la goumantasion lo pri mayi, lo blé, luil avèk lo gob lo fouti karbiran vèr,mé pa solman. É kan bann travayèr va komans vanzé pou tash moiyin gonf in pé z’ot pla, lo bann pri va monté. Sa lé pliské sir !
La nou la pa anparl in nafèr la. Nou la pa anparl bondié bann kapitalis, lo profi ! Akoz banna la pa tro antishé pou k’bann bann ti-kolon i viv mié. Sak zot i èm sirtou sé z’ot to-d’profi, avèk deux shif ,préférabloman. Donkalor, bann ti-kolon, mèm si noèl i ariv, kroi pa pèr noèl. Sansa zot lé riskab rès a tèr.
Konm lé parti, mèm dé zèf i sava goumanté.pars poul i ponn an rézonn sak zot i manz. Pou bien ponn, i fo zot i manz bien, bon manzé, an sifizans.. Sa i fé pans amoin in kozman in vié plantèr : sa la pa lo kozman in moun kouyon sa, sa la pa in parol la boush rouvèr,sa kozman in moun intélizans.
Gramoun-la téi di : « Poul i ponn par lo bèk ! ». Devine, devinaye : Kalkil in pé kosa sa i vé dir !

Justin