Zot i koné kossa i lé in sondaz ? Sa i mank pa, sa koméla... Banna i prétan tir foto lopignon pou savoir kossa li anpans in momandoné déssi tèl ou bien tèl késtion. Biensir, i sava pa késtione toulmoun : sa lé pa possib, mé si ou i shoizi bien out group de moun, ou pé an avoir in bon rézilta... Oté ! Zistoman ! Mi sort lir rézilta in drol sondaz ! Oui, lé ga ! Figuir azot, la parti dmann demoun si gouvèrnman lé mantèr sansa si li di la vérité ; si prézidan lé mantèr sansa si lé fran... Si zot lé ossi malfondé ké moin, moin lé sir zot va di, lé dé lé mantèr.
Figuir azot, pou in for majorité dmoun, lé dé lé mantèr déssi la késtionn la kriz dann lékonomi... Kant mèm, demoun noré pi dir, gouvèrnman i pé pa di la vérité vré, ou bien prézidan i vé pa afol demoun initil. Non mounoir ! Zot la di, lé dé i ramas mantèr, i sharj delo, i pène azot, i roul azot dan la farine. Lé domaz, pars si in pèp i pans sa déssi son bann dirizan, lé danzéré, lé mèm danzérab... touléka, lé pa bon pou la démokrasi.
Solman, outor, akoz manti konm sa ? Afèr di la mantri zordi, pou fé trap aou démin ? Pars la plipar d’tan sé konmsa mèm lé shoz i éspass... Fourmi i marsh sou la tèr d’moun i koné ! Alor parl pi in kékshoz konm lékonomi ! La-dan, si ou i manti, ou lé sir i tard pa, ou i gingn out boushtaguèl. Lé konm sa, lé pa otreman !

Justin