Dann Télé Réunion, lindi soir, l’avé in mol déba. Rodinèrman, mi profèr di sobatkoz, mé so foi issi lété si tèlman long, si tèlman mol ké sé moin té blizé débate pou pa gingn somèy, pou pa gingn tatane. Dizon lété fé éksepré pou k’demoun i aprann pa aryin... sof in n’afèr k’i pé di konmsa : kan ou na poin aryin pou dir, la pa bézoin ou i pass dann télé. Akoz mi di sa ? Pars figuir azot, na in gran-grèk la vni dir dann la kanpagn zéléksyon i koz pa ditou déssi l’ékonomi. Na in n’ote la di i di pa in mo déssi la fraktir sosyal. Pou konplète lo tablo, la di zéléksyon-la, sa in shok rant bann pèrsonalité, in shok bann z’anbisyon. Moin lété ziska apré domandé si banna té pa anfèrmé par-la, san zournal, san télé, san internet, san antann lo pli pti kozman in moun in pé o-kouran... é la pa tir azot zis pou vni koz dann télé. Moin la byin santi lo zournalis, ké lé kant-mèm pa in zéro la gosh in shif, tazantan té i konpran k’in drol z’afèr té apré éspassé, mé li té i rèss konm martin ki kouzi é li té kontante donn la parol inn, donn la parol l’ote, san zamé di son prop l’opinyon. Mi kroi li té apré mazine son diné l’apré frédi. Mi mazine ! Lé vré, Kolush té i di, la pa pars ou la poin aryin pou di ké ou i doi fèrm out také, mé koz dann oute an-parmi é koz dann télé la pa lo mèm z’afèr. In télé, sa i doi inform son bann télé-rogardèr, pa pou dézinform azot, pa pou fé déba konm lindi soir ;... éya bondyé, dizon RFO lé égal avèk li-mèm. RFO, RF Zéro.

 Justin