Na dé foi, in sityasyon i rapèl aou in liv ou la lir, sansa in film ou la gardé... La pa bézoin sa la éspass dann mèm péi, sansa dann in ka parèy, mé alé savoir pou kossa, sa i révèy bann souvnir lé antéré in pé dann fin-fon out ou-mèm.
I fo dir, dépi inn dé z’ané, i diré nana konm in sort konplo, issi, La Rényon. Kissa i roganiz sa ? I oi pa tro byin ozis ! Kissa nana l’intéré pou fé in n’afèr konmsa ? Lé pa fasil konète... Mé zot konm moin, nou lé byin blizé romark konplo-la.
Dabor nana bann politisyin la Droite, an parmi inn-dé diktatèr an aprantissaz : sa i vé pran la plas l’Alyans dann Konsèy rézional épi Konsèy zénéral. An plis nana l’Éta lokal, lé konm an missyon komandé pou ardrèss la Droite dann in sityasyon byin an golème pou èl. Epi, nana bann transportèr, bann l’antroprénèr pa tro klèr avèk z’inpo, avèk la sékirité sosyal… sa i tourn otour, konm papiyon la lanp.
Sa i rapèl pa zot lo film Z, la éspass la-ba dan La Grèce, la fini par l’assasinaz Lambrakis, in dépité kominis, épi par in kou d’Éta... L’armé la pran pouvoir,la mète La Grèce sou in réjime la diktatir. Sa i rapèl amoin vréman film-la !

Nb
kan listoir i répète,souvan-dé foi, èl i béguèy !

Justin