Mi koné pa si zot la gard la télé. Si zot la gardé, moin lé sir zot la pa mank romark in nouvèl lé inportan pou demoun la Vil Metz épi lé z’alantour, pars prézidan la Répiblik lété la, ministr la Kiltir lété la galman, épi in bann pèrsonalité i konte dann z’ot réjiyon. Zot i oi pa kossa i lé ? Oui, sa mèm, in gran mizé byin gayar avèk la form in shapo shinoi... in gran mizé k’i okip in sirfas dis mil mèt-karé... in mizé pou fé léspozissyon bann z’èv-d’art, nana déza dann mizé Georges Pompidou la-ba Paris. Konbyin sa la kouté ? Soisant dis milyon l’éro a s’ki paré… aryink pou lo batiman. Toute demoun in pé séryé an parmi bann politik, bann moun kalifyé dann la kiltir, é bann moun i vé ar-lans lékonomi dann réjyon-la, i di konmsa, sa in zoutiy inportan pou toute la réjyon, pou son dévlopman. Pou kossa ? Pars la réjyon va vni pli dinamik pars pli abité, é pli vizité par d’moun. Sa i rapèl pa zot aryin sa ? Sa i rapèl pa zot nout MCUR Konsèy réjiyonal i vé pi k’i fé ? Dis mil mète karé galman. Avèk in batiman k’i doi koute trante uit milyon l’éro... lo rèss larzan lé pou fé lo gran projé… kom pèrsone dann n’inporte ékèl l’androi la pankor mazine fé si tèlman sa lé orijinal. Par l’fète, zot i koné lo prézidan la Réjiyon la-ba lé dann l’UMP ? La n’ote ossi ! réjiyon-la i mérite in mizé an shapo shinoi é nou, ni mérite pa nout MCUR ? Sa in n’afèr lé pa fini sa !

 Justin