An tou tan, bann plantèr la gingn solman in pti pé larzan déssi sak zot la produi : tomat li, zognon li, salad li, mèm mang, létshi, banane sansa zanana. Par l’ fèt, bann kaparèr i ashté avèk zot, bon marshé, pou rovann i pé pli shèr, é lo vandèr té i doub kaziman lo pri.

Pétèt zot i pans tan-la lé fini épi sak té vré lontan lé pa forséman vré koméla ? Mé si zot i pans sa, zot lé dan lérèr pou vréman.

Moin la vi in plantèr salad dann télé té apré rakonté : in bazardyé i ashté salad avèk li trant santime lo pyé. Lo boug i arvann in pli gro ké li, in pé pli shèr donkalor li tir son tar. Épi z’apré, lo boug la ashté an dézyèm, i arvann lo salad dann bann gran sirfas, vik sé li k’nana lo marshé. Li ossi li artir son tar ! É lo grann sirfas i arvann son bann kliyan avèk son marj.
La, lo pri la fine ariv in éro, sansa in éro vin santime. Byinsir, sak lé vré pou salad lé vré pou bann léguime, lé vré pou bann frui : in boug i transpir, lé zot i fé larzan.

Kosa mi antan ? Na inn apré di bann plantèr lé si tèlman byin roganizé, i gingn pa ésploite azot konmsa ! A bon !
Sak i kroi sa pou vréman lé né yèr, sa lé sir. Mé sak lé sir, sé k’bann plantèr noré intéré roganiz azot.
Mé pandan s’tan-la, konm di l’ kont : kabri i manz salad !
Sak i koné pa sa, i koné pa tomat !

 Justin