La MCUR, sa sé ankor in sèrvis la Réjyon Rényon. Sé in pti sèrvis la fé in bon pé travay, é mi pans, in zour, san tro tardé, bann résponsab, i fo zot i fé in bilan… sar intérésan, é sak moin lé sir sé k’in bon pé dmoun va dékouv dé shoz zot té i dovine mèm pa... An parmi lo travay, sé la MCUR ké la fé sak i fo pou ké l’UNESCO i déside klass lo maloya konm Patrimoine mondyal l’imanité… nout maloya lété klassé konm sa. Moin noré mazine la plipar d’moun noré été kontan, noré été fyèr pou in n’afèr konmsa. Touléka, sa té i éspass lo promyé oktob 2009 é La Réjyon la déside inskri sa dann son site konm té i falé fé. Mé oila k’lo nouvèl majorité épi lo nouvo prézidan la déside éfas dossyé-la, ni plis ni moins, konmsi sa lété pa inportan, konmsi sa ou byin riyin té la mèm shoz, konmsi riyin l’avé éspassé. Donk a la plas, dann site la Réjyon, zordi nana in paj vide. Kossa k’la éspassé zour-la ? Aryin ditou. In gran lévènman ? Non, in lévènman dé riyin ditou. In désizyon in linstitisyon intèrnasyonal ? Non va, sa i konte pou la po patate. La MCUR i vé ranfors l’inité lo pèp rényoné, an rokonéssan la valèr bann kiltir nout zansète té i sorte l’Erop, l’Afrik, Madagaskar, l’Inn, la Chine épi d’ote zandroi ankor… é byin sir la kiltir rényonèz. In pé i komans par rongn nout maloya, é sa lé pa bon pars sa lé riskab fé lèv la guèr, diviz anou rant nou. Ki sar résponsab ? Konm di lo patoi : « Sak la plante lo van va ramas siklone ! ».

 Justin