…Mé si i plante plis sik-san mil pyé d’boi ? Mé si i mète pano solèr pou ranplas lo koméraz sharbon èk pétrol ? Si i fé roul loto éléktrik, kar éléktrik, kamiyon éléktrik sansa k’i fonksyone avèk lidrozène ? Si i mète tram-train dépi Sin-Bénoi ziska Sin-Zozèf papa bondyé ? Si i fé bann téléférik pou sort an-o, désann an-ba ? Sort an-ba, monte an-o ! Si i fé bann train éspésyal pou monte dan lé-o, avèk in krémayèr ou sansa in n’ot téknik ?

Bin alor, kossa k’i shanj ? Sé lo tout otomobil kant mèm !

Si i pèrmète bann vélo — kisoi mékanik pou bann kosto, éléktrik pou bann fay-pate — roul déssi la kote épi alé in pé oussa k’zot vé, san danzé, trankilman ? Si i pèrmète viv in pé byin dann bann vil, réspir in bon lèr ? Si bann marmay i gingn zoué vélo san traka ? Si la mèr i artrouv l’odèr la mèr, si bann flèr i artrouv l’odèr flèr ? Santi in kou, zot va voir !

Bin, kossa k’i shanj, sé lo tout otomobil ! Mi di azot !

Si i fé in konpagni pou transport marshandiz par bato dann loséan indyin ? Si bann bato i marsh avèk bann voil épi bann karbiran prop ? Si bann bato la pèsh i marsh avèk z’ot voil konm sète komandan Kousto ? Si — pétète mi rèv — i ranplas l’aviyon par bann dirizab, konm la fé lontan mé avèk in pé plis sékirité, sansa si l’avyon i arète marsh èk pétrol ?...
Si i fé tanpir k’i pé in l’agrikiltir bio, si i arète fé manz anou z’inséktisid, épi l’angré shimik ? Si i fé la kaz byin aéré, sansa si i klime-ali avèk lo d’mèr ? Si ni nyabou fé nout révolisyon ékonomik épi ékolozik, donn travay Kréol, ède nout bann voizin fé parèy ?

Bin, sé lo tout otomobil, ankor ! Lo tout otomobil, vous dis-je ! Lo tout otomobil, mi di azot !... In kozman na poin défo !

Justin