Mi sort oir dann télé in bann lémissyon dsi la rouvèrtir la route tamarin : la di plin z’afèr, la amontr plin z’afèr ! Moin na konm linpréssyon tout demoun té kontan ; solman, konm m kroi pa pèr-noèl, mi doute pa k’in pé dann fon z’ot kèr té apré margogné, pars ziska dèrnyé linstan, mi kroi zot la atann in katastrof, la pa arivé.

La vi lé konmsa, lomoun lé konmsa ; konm di l’ kont, nana touzour in pé lé partizan la politik lo pir : nana touzour in pé k’i rèv aryink oir bann prozé kalbité, mèm si i fé d’tor lo pèp rényoné.
Kan té fine rouv la rout, kan bann loto té fine pass dann sans Saint-Pol - l’Étang-Salé épi dann l’ot sans, moin la kroiz in dalon filozof, la di amoin, noré été byin si tout té i mète d’akor pou fé avans lé shoz !

Byinsir li nana rézon ! Noré été byin pou vréman ! Solman nout filozof, kansréti in néstan, la oubli la vi é son bann kontradiksyon.
Pou mon par, mi domann amoin touzour koman lintéré zénéral i nyabou, souvan-dé foi, pa toultan trouv son shemin galizé an parmi tousa bann lintéré partikilyé ! Mi domann amoin koman bann dirizan i trouv la fors pou fé in n’afèr kan nana si tan tèlman difikilté !

Dizon, bann dirizan i trouv so fors-la dann la konfyans lo pèp, si lo pèp la vréman konfyans dan zot. Moin, sé sak mi kroi !

Justin