Matante Zélida la ékrir Justin : Mon shèr nové, mon spès salté, La moin lé sir, zot, bann rouj-de-fon, i sava ankor roprosh mon pti prézidan toute z’afèr, mèm si li lé pa pou aryin la-dan. Moin lé sir zot i sava di, sé par son fote si bann rotrète vyé moun i sava diminyé. Pars na in n’afèr sinp : ou i pé partaz sak nana, pa sak ou na poin. Bann moun azé i travay pa, sé bann moun i travay k’i pèy zot rotrète. Mé si in bonpé d’moun i travay pa, koman va fé pou pèy la rotrète. Arzoute an plis demoun i viv vyé, kaziman in bann Matizalème. Alor, oi zot mèm, i tir pa d’lo dann rosh, i tir pa bon rotrète dann i pti kèss vide. Tok, pran sa pou toi !

Justin la fé pou répons : Mon vyé matante k’i koz touzour la boush rouvèr, Ou na byin rézon : la pa dann rosh i tir d’lo, a moins ké ou lé konm Moïse. Mé oute rotrète-la, sa lé kalkilé déssi oute salèr, déssi lo tan ou la travay. Donkalor, si i lèss aou san travay in bon koup de tan, si oute salèr lé mèg vèy pa, oute rotrète lé riskab d’ète in pé fay. Mèm pa assé pou ou gingn lo minimome k’i fo aou pou viv. An atandan, in pé i dor déssi zoréyé an plime, i roul dann loto fantézi, la kaz lé konm in pti shato, é i bénéfisyé lo boukliyé fiskal. Alor, si ou i vé, lo prézidan lé pa résponsab, mé sé son bann réform la fote. Topette, morette !

Justin