Mi pans lalkol, sa in bon rézon pou fé in sobatkoz. Pars lalkol i fé bonpé déga, épi demoun i èm si telman boir sa : in mové zafèr pou déssèrtin moun, in bon zafèr pou d’ot.
Donkalor, moin té i pans ladministrassion té i poik ali avèk linpo, konmsa demoun i diminié zot konsomassion épi i mète in pé lo frin avèk sa.
Moin té i kroi, mé moin té i tronp, akoz déssi déssèrtin lalkol i fé issi, té i aplik mèm pa loktoi d’mèr. Sa lé vré pou vréman ! Poitan, moin lé sir zot galman zot i kroi sa té pa vré.
Tanpir k’i sava, tanpir la maladi lalkol i goumant : pou bann madam, pou bann jènn, pou bann marmay ziska, parl pa pou bann rakié patanté...
É di pa i koz pa la-dsi : in zour i di k’i mète arpi lo ronm dann pil plate, in zour i di k’i fo boir avèk modérassion... in tan té i montr tout kalité laksidan, té i fé oir in jènn boug bann tantine i anvoy ali dingué si tèlman li lé vilin kan li lé sou... Sé domaz, sa i fé pa léfé konm k’i fodré ! Alor in pé la di, i fo mète in linpo in pé for déssi : aplik in bon loktroi d’mèr.
Zot la rézon, ou bien zot la tor ?
I fo diskité sérié épi pran bann mézir konm k’i fo... sansa la réjion la di va goumant la taks... Sirtou si i arète pa koz la boush rouvèr, koz pou la po patate.

Justin