Tout demoun i pé an avoir son pti grin la foli. Sa lé normal !In pé i di, na plis demoun i mank azot in fèy an déor l’opital k’anndan. Mi mazine, san so grin la foli, bann demoun noré viv ankor dann bann kavèrn, konm nana lontan, pli lontan k’lontan. Déssèrtènn foi, kant mèm,lé pli préférab ète in pé rézonab ké rézodiab !
Mi sort antann in nouvèl la radio. Mi pé asir azot, moin la pins amoin, par moin-mèm pou sèy oir si moin té fine lévé sansa si moin té i dor ankor, si moin té pa , konm di lo kont, apré ral mon karang an plin zour...Mi sort antann, in pé i rod lav loto san lo : akoz pa ? I lav déza linz san savon dann mashine-a -lavé bann shinoi ;mi parl arpa lo lékspréssion kréol « raz san savon » akoz sa in ménas.
Dann radio, moin la antann lo pri, épi lo tan k’i fo, épi ankor lo kantité d’moun l’antropriz la anboshé. Alors, moin la kalkil in pé : i trouv pa larzan déssou la pat shoval La Rénion, tout bèl galé ousa lavé trézor kashiété, la fine roulé. Défin Bibik la fouyé, la fouyé, san trouvé !
Azout ankor tout sak nana pou fèr, konm lantropriz dann nout péi. : bann z’afèr i ansèrv anou, i prépar l’avnir, i pé gonf in pé lo pla demoun.Pou in moun i vé rouv in l’antropriz, l’idé i mank pa !.
Bon ! Mi vé pa dékouraz pèrsone..Mi souète lo moun la fé sa, li réissi épi bann moun i gingn travay, i gingn z’ot soso konm k’i di... Pou zordi, mi mazine -éskiz amoin !- lo shovalié Don Quichotte, bann roman l’avé rann ali in pé gazé, té apré rod partou son « dulcinée du Tobozzo ». L’amène ali ziska pou soubat avèk bann moulin-a-van.