Matante Zélida la ékrir Justin :

 Mon shèr nové, mon spès salté !
Kossa mi antann-la ? Kossa mi aprann-la ? Zot, bann rouj-de-fon, zot lé vréman monstré ! Alors, zot i vé k’i défann tiliz l’angré avèk produi dann l’agrikiltir ? A s’ki paré, zot i vé k’i ranplas bann pyé salad byin kosto, byin pomé, par bann ti-pyé shéti ! Alors zot i vé k’i siprime bann volay byin gra é k’i ranplas sa par bann ti volay mèg-mèg, i mète plis in an édmi pou vnir in pé konsékan !
Konm banna té i di avan, zot i vé fé mor demoun avèk la faim. Zot i vé fé manz demoun lo rosh ! Tok ! Pran sa pou toué !

Justin la fé aèl pou répons :

 Mon vyé matant k’i koz touzour la boush rouvèr !
Ou lé pa fatigué avèk so bann fime i pass pi ? Avèk so bann diks réyé ? Vi konpran pa lé tan arète fatig la santé d’moun avèk bann produi shimik ? Vi konpran pa lé tan arète fatig la natir ?
M’a dir aou : moin lé byin èz antann aou dir sa, vik’ la pa nout bann tousèl lé dakor èk sa. .An parmi, nana méssyé Borloo ! Vi koné byin sa in onm de droite, sa in minis gouvèrnman la Frans. É kossa li di ? Li di k’i fo plizanplis dévlop in lagrikiltir biolozik, sansa in lagrikiltir rézoné. Alors, siouplé, armète in pé a-l’èr out révèy k’i marsh pi !

Justin