Dopi 2004 ziska zordi la violans dann bann koupl la goumanté : si dan la Frans la goumant trant pou san, La Rénion la goumant plis ankor : karant-sèt pou san. Dan la plipar d’ka sé bann madam k’i soufèr plis. I pass pa d’moi, i pass pa d’sémène, i pass pa d’zour san k’ou i antan mové nouvèl ; kisoi dann télé, kisoi dann radio, sansa dann zournal. Na dé foi, kan in madam i domann sokour, la polis i déranz. Na dé foi ossi,mèm si la pèrsone i ékri prokirèr, malèr i ariv avan k’ bann z’otorité i gingn bouzé. In pé i di, dann déssèrtin ka, la pa sèy trouv in moiyin pou évite lo krime. Kissa lé résponsab si la sosiété lé violant ? Kissa lé résponsab si lo zidé bann demoun i pous azot dan la violans ? Koman trouv in solission pou règ in problèm konmsa ? Moin pèrsonèl, mi pans bann gouvèrnman - la pa arienk lo dèrnié ! - i fé pa assé mèm si bann dépité, konm Huguette Belo, la pa arète konbat la violans kont bann fam dépi tan-é-tan d’zané. Zordi na in psy, i di konmsa : déyèr la violans nana la soufrans ! Daoir li nana rézon solman, bann madam la konète la soufrans étan marmay épi la violans, la soufrans étan marié sansa an ménaz épi la violans, la soufrans dann travay épi souvan dé foi lo arsèlman. Zot i pans pa na in pé, na in pli for doz la soufrans ké lé z’ot ?

 Justin