Mi anvoy inti fonnkér pou la sominn kréol dann zot zournal.
Mon kalité kréol batar
Na pwin méyér mizik ké loson la pli si latol dann péryod vakans
akokiyé dann kouvért kosté sanm ti frér ék ti sér.
konm royom lomir antouré sanm papyé zournal ék katalog pou abiy la kaz,
rido plastik tout koulér an gardkor la port
mi rapél ankor konmsi té yér
dann bardzour mon vi , san laryaz, san tripotaz
té gayar lavi kréol dann lantouraz famiy.
yér konm in tablo, zordi konm in pyés mizé,
mina souvnans lodér la tér dann zardin flér lakaz granmér
mi romazinn galopaz déryér volay dimans matin pou kari onzér
rapél azot kan té bros savat la riyél si galé linz, mét ali név pou fé lo fyér dann somin labou
ankor in zoli vizyon dann mon koko kan mi férm lozié.
Bonpé fanal ma nyabou défann teinn pou kontourn gafourn
parlfét ma kontinyé très’ gran bertél mon vi ék lyane la kiltir kréol
ladan an mayaz néna tout souvnans kan té zwé kanét ék lastik dann fon la kour,
kan té zwé tikaz dann galabér, té poz lakol pou békroz,
bann moukataz domounn anlér si nout batarsité, si nout kozé « an kaf »
té gadyanm kan té sava la riviér lav linz ék la fami.
la vi la kas kontour kan mila komans kompran parol ziskakan, danyél waro, bastér, ravan...
té bann gro koud kony pou lokér ék léspri.
lontan marmay té kasiét dann kwin lakaz kan gramoun té soubatkoz.
mémsi mon fougad té i mont kan fwét pés té i ronf
mérsi bondyé pou lamontraz la vi mon bann famiy
mi avans dann la vi konm la més la lamp pétrol i bril
ti-bout, ti-bout, ti-ginn, ti-ginn
mwin la travérs santyé pou trap si lot bordaz la konésans, linstriksyon èk bon manyér
mwin lapa oubli ral ék mwin léritaz bann granpapa, zot lang, zot kroyans, zot soufrans, zot kalité nwar dobout
mwin la zanbrokal tousa pou démaliz mon vi
zordi fo soubat ék lévolisyon, mi éskiv la « frans(mantér)sité »
konm bann séf maron té i défil dovan fisiy misar
mérsi cimandéf, ansain, faon... pou lokér maron, bandér, margonyér zot la donn amwin.
Mi gard léspwar kinzour lo pép Réyoné va nyabou diriz son péyi.
mon ti fonnkér pou la sominn kréol
bonn fét zot tout
Témoignages
Mi anvoy inti fonnkér pou la sominn kréol dann zot zournal.
Mon kalité kréol batar
Na pwin méyér mizik ké loson la pli si latol dann péryod vakans
akokiyé dann kouvért kosté sanm ti frér ék ti sér.
konm royom lomir antouré sanm papyé zournal ék katalog pou abiy la kaz,
rido plastik tout koulér an gardkor la port
mi rapél ankor konmsi té yér
dann bardzour mon vi , san laryaz, san tripotaz
té gayar lavi kréol dann lantouraz famiy.
yér konm in tablo, zordi konm in pyés mizé,
mina souvnans lodér la tér dann zardin flér lakaz granmér
mi romazinn galopaz déryér volay dimans matin pou kari onzér
rapél azot kan té bros savat la riyél si galé linz, mét ali név pou fé lo fyér dann somin labou
ankor in zoli vizyon dann mon koko kan mi férm lozié.
Bonpé fanal ma nyabou défann teinn pou kontourn gafourn
parlfét ma kontinyé très’ gran bertél mon vi ék lyane la kiltir kréol
ladan an mayaz néna tout souvnans kan té zwé kanét ék lastik dann fon la kour,
kan té zwé tikaz dann galabér, té poz lakol pou békroz,
bann moukataz domounn anlér si nout batarsité, si nout kozé « an kaf »
té gadyanm kan té sava la riviér lav linz ék la fami.
la vi la kas kontour kan mila komans kompran parol ziskakan, danyél waro, bastér, ravan...
té bann gro koud kony pou lokér ék léspri.
lontan marmay té kasiét dann kwin lakaz kan gramoun té soubatkoz.
mémsi mon fougad té i mont kan fwét pés té i ronf
mérsi bondyé pou lamontraz la vi mon bann famiy
mi avans dann la vi konm la més la lamp pétrol i bril
ti-bout, ti-bout, ti-ginn, ti-ginn
mwin la travérs santyé pou trap si lot bordaz la konésans, linstriksyon èk bon manyér
mwin lapa oubli ral ék mwin léritaz bann granpapa, zot lang, zot kroyans, zot soufrans, zot kalité nwar dobout
mwin la zanbrokal tousa pou démaliz mon vi
zordi fo soubat ék lévolisyon, mi éskiv la « frans(mantér)sité »
konm bann séf maron té i défil dovan fisiy misar
mérsi cimandéf, ansain, faon... pou lokér maron, bandér, margonyér zot la donn amwin.
Mi gard léspwar kinzour lo pép Réyoné va nyabou diriz son péyi.
mon ti fonnkér pou la sominn kréol
bonn fét zot tout
MARONAZ (Didyé nwar dobout)