Dimansh o soir, moin la rogard dann télé in n’afèr, pou moin té valab : in limèb HQE ("haute qualité environnementale"), dann Sin-ni ! Oui, mon fra ! Shof-lo solèr i done lo-sho, plak solèr i donn kouran, delo la plui i vien pou diminyé la faktir d’lo ; épi dan la sal de bin la poin bégnoir mé nana la doush, lé moin gourmann lo. Lé valab pars ziska zordi lavé aryink inn-dé lékol-lysé, inn dé batiman piblik, inn-dé limèb biro lété konmsa.

Lé byin pars banna i di ossi, lo tro d’kouran va vann ÉDF, donk va gingn diminyé lo pri loiyé. Sa lé byin bon ! I fo kontinyé, i fo pa arète la !
Pars si i anparl diminyé lo pri loiyé, in éstidyo va kout kantmèm par-la katsan éro par moi, lo rès v’alé an goumantan ziska in kat pyès pou uisan éro.
Lé pa shèr ? Byinsir pou sak nana in pé lo pourko, mé pou sak na poin tro ? Byinsir nana lalokasyon-lozman, mé sak banna i apèl lo diféransyél, lé riskab pèz déssi porte-moné in bon pé, ziska fé pète son trip !

Donkalor, mi di pa moin lé pa kontan, moin lé pliské kontan ! Mé sak mi souète sé k’bann moun in pé o-flan, zot ossi, zot i pé bénéfisyé in n’afèr konmsa. Sansa zot va di : « Dévlopman dirab oui, mé kossa sa i raport amoin ? ». É si i raport pa li aryin, li lé riskab anvoy fèr foute, épi pans : dévloman dirab, li lé pa la èk sa ! Sré domaz, non ?

Justin