In dalon k’i arète dann péi la fré, la anvoy in pti zournal gratuite* pou moin. Solon li dann zournal-la, i késtyone in gran t’ome. Moin la rouvèr lo zournal, épi moin la vi té i anparl méssyé Estrosi, mèr d’Nice, in gran vil dan La Frans épi miniss pou la rolans l’indistri… Mon léspri kassèr lé kui la lèv toutsuite é moin la domann mon dalon si li di sa pars lo boug sé in kass papaye san golète, sansa si li pans vréman lo boug nana d’ote shoz ké zi d’lav-la dann son tète. Apré moin la byin rogarde lo zournal épi moin la romarké, l’apré monte in gran projé, avèk l’ède la bank épi bann l’antropriz téléfone mobil, pou tash moiyin an avoir déssi son téléfone toute kalité ransègnman byin nésséssèr, mèm fé shanjman l’adrèss, komann in n’afèr ou la bézoin, anfin fé in bon pé d’shoz... I paré, sé promyé foi ,i fé sa dann in gran vil l’Europ, donk moin la pans méssyé Estrosi sé in boug de progré. Touléka, pou lo progré téknik, pars pou lo rèst, mi koné pa byin, mèm mi doute... Dann mèm paj nana lo portré lo tram-train la vil Nice. Oui lé ga ! Alors, moin la rapèl ke méssyé Estrosi la vni issi. La Rényon, dann la kanpagn rézyonal épi li la di, nou nora poinn tram-train... gouvèrnman i pèyera pa lo larzan mankante. Donk, si mi konpran byin, lo tram sé pou la-ba, lo progré sé pou la-ba, é pou nou l’aryérasyon ! Tou zis, si talèr i di pa nou, lèss lo progré par koté, épi anon artourn an aryèr, artourn dann fénoir... artourn lo bon tan kolonyal, ousa nou té i mète payaka déssi la tète.

 Justin 

NB :

payaka, sansa palyaka : in sorte moushoir, bann vyé madam téi mète déssi zot tète, dossou z’ot kapline, sansa anmaré kat koin pou anpar lo van, solèy, la fré..

lavla, bandèj, baké : in résipyan té i ansèrv pou fé la toilète dodan.

* lo zournal i apèl "Direct Montpellier" - son date, lo 21 mai 2010