29 octob 2009
Matante Zélida la ékrir Justin :
Mon shèr nové, mon spès salté... Alors, bann rouj-de-fon, i prétan dir lo gouvèrnman, kossa lé bon é kossa lé pa bon pou La Rényon... Pars, pran pa d’moun pou marmay lékol : kan zour apré zour, dann z’ot torshon rouj zot i di sak lé bon pou l’énèrzi, sak lé bon pou l’agrikiltir, pou l’patati, pou l’patata... étsétéra-étsétéra la ké lo ra ! An rézon, dann toute domènn zot nana in solissyon paré pou propozé, in program pou mète anlèr… donk gouvèrnman i ansèrv de riyin, li alors ? Kroi moin, l’orguèy va fini par fé pète z’ot jabo ! Tok ! Pran sa pou toi !
Justin la fé pou répons :
Mon vyé matante k’i koz touzour la boush rouvèr. Dabor, pou komansé, sak i pas dann nout zournal koméla, sé in program konsèy zénéral épi konsèy rézyonal la fé ansanm-avèk san agard kèl parti zot nana la karte... In pé lé mèm pa marké dann in parti... Dézyinm afèr, sé gouvèrnman li-mèm la di bann rényoné pran la parol pars li oi pa tro kèl program i fo fé pou La Rényon... Donkalor, sak zot la fé, lé byin normal, vi k’gouvèrnman la domandé. Arzoute èk sa bann rényoné i vèy azot konm lé dsi l’fé, pou oir si zot i fé bon prozé pou lo péi... Mon vyé matante, konm di lo kont, vi pé pa z’ète pli roiyalis ké lo roi... pli a-droite ké la droite.
Justin
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).