Vin désanm, la fini par ranport la viktoir, issi La Rényon ! I diré mi antann in pé mové lang apré margogné, apré domandé si moush-a-bèf la pa pik Justin... apré di zot lé pa dakor... pars vin désanm 1848, sa lé fine passé dépi lontan. L’abolisyon lésklavaz lété définitif !
Sa lé byin vré, mé i fo dir, pandan lontan la pi parl dé sa... la fé konmsi sa lété déyèr nou é té nitil anparlé... nitil mark sa dann listoir... nitil bann nouvèl zénérasyon i koné, fi-t’in tan, l’avé lésklavaz La Rényon. Kan doktèr Raymond Vergès, l’ané 1945, la fé mète in plak déssi plas Barachois épi la fé plante in pyé d’boi la libèrté, son bann partizan la bate la min... mé la nuite, in bann, san konprann, la arash lo pyé d’oi épi la zète la plak dan la mèr. Fransh vérité ! Zour-la, moin lé sir, lo kèr in bon pé Rényoné la sinyé !
Afors tan, la fé in ka avèk so labolisyon-la ! L’ané 1982, gouvèrnman la déside Vin désanm sar in zour féryé, shomé, péyé… mé lété pankor fini èk sa pars lo mèr Sinni, dann tan-la, la sèy ranplas la fète la liberté par la fète létchi, épi kan l’égliz la rode in date pou mark Frèr Scubilion dann kalandriyé, la pran la date vin désanm. Pou moin, sa lété konm in rash kèr. Boudikont, Vin désanm la fini par ranport la viktoir dann kèr bann Rényoné... gingn son plass anparmi bann manifèstasyon ofisyèl. Vin désanm la gingn la viktoir, définitivman !

Justin