Na dé soir, moin l’apré rogard zournal parlé dann in télé. Zot i koné, dann in zournal télé, i parl vitman-vitman d’in shoz épi d’in n’ot. Lé rar i fé travay out tète, pars, fransh vérité, la pa tèlman sa lo bi. Lo bi, an parlan par réspé, sé konm k’i diré amène aou pou gob bann z’idé dominante épi tourn in pé lo do avèk la vré vi, sak ou i amène, sak ou i sibi. Anfin, dizon, na poin arien lé nouvo désou solèy.
Na dé foi, i di in n’afèr, sansa i anploy in mo i di bonpé dési la mantalité lo moun l’apré kozé. Sa lé vré pou lo zournalist, sa lé vré galman pou la prézantatris, konm pou in pèrsonaz i maye dann in sékans l’aktyalité. In légzanp ? Mèrkrodi soir, lété apré parl dési in kor demoun la trouv dann in savane La Rényon. In om de loi té apré éspliké kèl koté lété, koman la fé pou trouvé... Lé normal, i poz ali késtyon, i fo li réponn. Mé sak lé pa normal, sé kan pou an parl lo marmay mor, li di lo « l’individi ». Sa la fé amoin in n’afèr, pars si lété mon famiy, moin nora pa ème i anparl ali konmsa, pars moin na konm l’inprésyon la poin ditou, kansréti, in grin la konsidérasyon pou li, sirtou l’èr li lé désédé. Zot i koné, Rényoné na bonpé réspé pou lo mor !
Imazine in kou, kan dé Fransèz lé mor dann l’Argentine, si in zandarm l’avé di la artrouv lo kor lé dé z’individi : noré fé in gro éskandal ! Mèm shoz, kan dé solda fransé lé mor dann l’Afganistan... Zot i oi in pé in radyo apré anons la mor dé z’individi. Mi di pa zot koman demoun nora réazi. Mé konm sé in pti kolon La Rényon, pa in éro la guèr, pa in pèrsonalité... non, arienk in pti kolon. Donk i pé di in pé ninport-ékèl mo, i pé nonm ali, in z’individi. Sanm pou moin, sa in fason dir kèl kalité l’éstime, kèl kalité la konsidérasyon nana pou lo moun. Touléka, sa i fé pa valoir lo boug la di sa, é moin noré anvi dir lo boug, z’individi ou mèm ! La pa lo pti Kréol lo z’individi !

NB : Z’individi, in mo nana plizyèr sans ; anparmi : « homme quelconque, dont on parle avec mépris... individu louche » — dans “Larousse” de poche.

Justin