28 mars 2008
Dann in sobatkoz rant Poudroux, épi Thierry Robert, dann la kanpagn pou zéléksion lo mèr, in momandoné lé dé sobatkozèr la mète a parl déssi lo féstival Sakifo. Méssié Poudroux, an bon kréol lé o, i koné manié sak ni pé apèl lo gro léspri , la di èk son ladvèrsèr : « Avèk moin sé lo sakifo, avèk ou sar lo sakifo-pa ».
Mèm sa Robert la gingn zéléksion épi Poudroux la rèst a tèr...Lèr-la lo késtionn féstival i arvien dann laktialité : in pé i di i fo koup sa, akoz i amène dézagréman. In pé i di sa in n’afèr i fo vèy konm délé si d’fé pou k’i siprime pa. Lo résponsab i kri, tansion pangar akoz sa son zanfan, li vé pa k’i disparète.
Lé vré, moin lé pa tro in gran féstivalèr...Plipar d’tan mi sar pa mé moin k’i rès pa la-ba, mi oi koman dann déssèrtin landroi la vi kiltirèl lé mol, ou i pans si lavé in bon féstival pou amène demoun épi pou fé konète la vil, noré pa été in mové zafèr. Alors, mi di i fo sakifo i kontinié : si nana dézagréman i fo korizé tan pir k’i pé. La mète Poudroux déor, mé la pa pou tir tout sak la fine fé. Dizon i fo pa zète lo zanfan, avèk dolo bandèz*.
*in spès kivète an tol té i bingn zanfan anndan,sa téi apèl galman lav-la
Justin
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).