17 mars 2009
Moin lé près sir, in pé dmoun — an parmi sak i sort déor — i pans avan zot l’arivé, La Rényon té i égzis pa. Dizon plito : na in tan avan zot — in sort moiyin-naz — é in tan avèk épi apré zot, la modèrnis.
Mi pans désèrtin bann gran fonksyonèr Léta lé konm sa. I diré, mi antann déza koman zot l’apré kozé, zot vèr uiski dan la min :"bann Kréol lé konmsi ou byin konmsa", "nou k’i koné so départman-la" étsétéri-étsétéra-la ké lo ra !
In zour moin la antann in moun apré di in n’afèr moin té i mazine mèm pa : lété apré di son kamarad, bann demoun isi i drès bann kok pou shanté tou lé z’èr, vik zot na poin révèy. Alor, kosa zot i di dsa, mon bann konpatriyot bourboné, drésèr d’kok san savoir ?
Lé ga ! Lé vré nout listoir lé pa long, li sré mèm in pé kourt-kourt ! Lé vré lékol la fé lo nésésèr konmsa ni koné pa nout l’istoir, nout pèpléman, nout sivilizasyon ! Mé nout péi-la, ni koné ali par anndan, sé li k’la fé anou é nout bann vyé zansète la fé nout lédikasyon, nout tradisyon, nout manyèr viv é nout manyèr konprann la vi.
Donkalor, pou sak i sort déor, i fo pran lo tan, i fo an avoir la pasyans pou konprann kansréti in pti pé lo péi épi lo moun k’i viv isi ! Zis in pé la modésti, si plé t’a Dyé !
Justin
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).