Chroniques

« Bèf i trap par son kord, le moun i trap par la lang. »:in kozman pou la rout.

Témoignages.re / 11 janvier 2019

In pé i di bèf i trap par son korn é mi souète azot bon kouraz. D’ot va di i trap par son fèr d’né. An lèr-la moin la mark par son kord. Anfin, fé konm zot i vé, sansa konm zot i pé…pars trap in bèf d’apré sak mi souvien la pa kékshoz fasil pou vréman.

An touléka, kisoi son kord, kisoi son fèr d’né, kisoi mèm son trou d’né sé par in l’androi frazil k’i souk ali. L’èrla, kan ni di landroi frazil,pou demoun, ni pé anparl la lang. I vé pa dir la lang par li mèm,lé frazil mé la lang i koz avèk sa, épi i ariv a dir bone shoz konm movèz shoz é ou i pé protèz aou par out kozman, mé ou i pé anfons aou galman par out kozman.

La lang dé foi i pé fé dir a ou dé shoz danzéré kisoi pou lé zot, kisoi pou ou mèm é nout kozman zordi i mète anou an gard kont nout prop lang.Alé ! Mi kite azot rofléshi la dsi é ni artrouv pli d’van. Sipétadyé !